Аргыс ардахтар

Былыт кэлэр курустук
Ардах түһэр чуумпутук,
Барбыты суохтуу турабын
Ахтылҕан ырыатын аныыбын.

Аастылар айан ардахтар
Аргыс кэриэтэ самыырдар,
Ааспыт суолбун сууйбуттар
Эдэр саастыын куоппуттар.

Суохтуур эбиппин ардахха
Эдэр сааһым доҕорун,
Оспут олоҕум ыллыгын
Ыраас тапталым тылларын.

Бүгүн ардах анныгар
Көрөбүн таптыыр күлүкпүн,
Онно ырыам тылыгар
Көрсөбүн ахтар доҕорбун.

Онтон ардах тохтообот
Ааспыты суурайар астыбат,
Олох ааһар ыраатар
Ахтылҕан ырыатын ыллатар.

Эбии аах:

  1. Андреев Егор Хоһуунай:

    Махтал хоһооммун интернет ситимигэр ааҕан соһуйдум даҕаны,үөрдүм даҕаны!
    Махтал Айар куттарга, аргыс доҕотторго!

  2. Варвара Попова:

    Бу Сахаимхолайк диэн интернет хаһыат. Ити «Айар кут» диэн уруккуттан салаа аата, бөлөҕү кытта биир ааттаах буолан хаалбыт. Арааһа, мээнэҕэ буолбатаҕа буолуо

  3. Хоһуунай:

    Аргыс ардахтар былырыын сайын уһун ардах кэмигэр суруллубута.Бу хоһоону Иэйиим куорсуна группаттан Марианна Федотова Намыына таба көрөн мелодиялаан ыллаабыта
    Бу ырыанан Саҥа ырыаҕа кыттан үөрдүбүтэ
    Махтал нарын кэрэ Намыынаҕа хоһооммун кынаттаан көтүппүтүгэр!

Бэлиэтээһиннэр

Ваш e-mail не будет опубликован.