Күннүк Уурастыырап 110 сааһыгар анаммыт биэчэр

Норуот тапталлаах ырыаһыта, тойуксута, олоҥхоһута, САССР норуодунай поэта Владимир Михайлович Новиков – Күннүк Уурастыырап төрөөбүтэ 110 сылын көрсө республика үрдүнэн араас тэрээһиннэр ыытыллаллар.

Ыам ыйын 31 күнүгэр П.А. Ойуунускай аатынан литературнай музейга «Саха» НКИК үлэһитэ Евдокия Избекова оҥорбут киинэтин көрөн, Күннүктүүн алтыспыт суруйааччылар Урсун, Тумарча, Харысхал ахтыыларын истэн, уһуйааччы Е.М. Поликарпова, кини салайыытынан «Эйгэ» устудьуоннар ансаамбылларын «Күннүк айылҕаны хоһуйуута» хоһооннорунан дьүһүйүүтүн, Юрий Борисов олоҥхотун, чугас дьоно, биир дойдулаахтара, поэзия сүгүрүйээччилэрэ ахтыыларын, арыылаах алаадьыны кытта сылабаардаах итии чэйи иһэн сэлэһэ- сэлэһэ ахтан- санаан аастыбыт.

Урсун ахтыытыгар Күннүк Чурапчыга тахса сылдьан ыанньыксыт ырыатын истэн олус долгуйан, уйадыйан: «Новгородова кэнниттэн эн иккис эбиккин», – диэн улахан сыанабыл быспытын, оттон чурапчылар Күннүк ырыатын истэн-сэргээн «отой өлбөтөххүнэ сатаныыһы», – диэн сыанабыл биэрбиттэрин, Уурастыырап сэргэх аргыс буоларын – айаннаан истэххинэ барытын кэпсиирин: «Бу сиргэ бу киһи олорбута… ол сиргэ ол киһи олорбута», – диэн лабырҕаччы билэрин, быыһа суох кэпсиирин истиҥник аҕынна.

Тумарча олус судургу уонна чочуллубут тыллардаах Күннүк курдук поэты билиҥҥэ диэри көрө илигин, көтөрү-сүүрэри майгытын олус үчүгэйдик билэн, ойуулаан суруйарын, «Лоокууттуун кэпсэтиини» иккис кылааска үөрэнэ сылдьан өйүттэн ааҕарын туһунан ахтыытынан Күннүк саха поэзиятыгар миэстэтин ырылхайдык эттэ.

Олоҥхоһут Юрий Борисов бэйэтин олоҥхотуттан ыллаан иһитиннэрдэ, опера солисткалара Анегина Ильина, Нина Чигирёва истэн хайҕаан, эдэр киһиэхэ айар үлэтигэр саҥа кыымы сахтылар.

«Күннүк айылҕаны хоһуйуута» хоһооннорунан монтаһы ХИФУ устудьуоннара өрө күүрүүлээхтик ааҕан мустубут дьону сэргэхситтилэр. Харысхал олус көрдөөхтүк ахтарынан, кинилэр оскуолаҕа үөрэнэр кэмнэригэр суруйааччылары барыларын өлбүт эбэтэр отой бүдүгүрэ кырдьыбыт курдук саныыллар эбит. Күннүк кэргэнэ Надежда кинилэри саха тылыгар үөрэтэрин билбэккэ: «Бу Күннүк Уурастыырап хаһан өлбүтэй?» – диэн ыйытан, » Маарыын сарсыарда чэй иһэ хаалбыта», – диэн харданы ылан соһуйбуттар.

Уран тыл маастара, тапталлаах ырыаһыппыт Күннүк Уурастыырап барахсан:
«Көмүһүкчээн ини мөһүүрэчээн,
Төгүрүкчээн ини көлүкэчээн,
Кылбачыгас ини долгуҥҥун
Кытыыларгар ини тиэрдээриий,
Кылыһыктыыр ини отторгун
Кырыылаахтыы ини бигээриий!» – диэбит курдук саха киһитэ уйаҕас кутун уот харахха ойуулуур тыллардаах поэзията үйэлэргэ аатын ааттата туруо диэн эрэл баар.

Эбии аах:

Бэлиэтээһиннэр

Ваш e-mail не будет опубликован.