Михаил Гоголев — Долгун кинигэтин сүрэхтэниитэ

Ыам ыйын 27 күнүгэр Горнай улууһун Бэрдьигэстээҕэр Мэхээлэ Дьөгүөрэп аатынан сынньалаҥ киинигэр «Айылҕаттан анатыылаах, өбүгэлэртэн үөттэриилээх» диэн ааттаах СӨ баһаарынай сулууспатын бэтэрээнэ, Норуоттар икки ардыларынааҕы суруйааччылар түмсүүлэрин уонна СӨ суруйааччыларын сойууһун чилиэнэ Михаил Павлович Гоголев-Долгун кинигэтин сүрэхтэниитэ буолла.

Саха киһитин сиэринэн булчут сорсуннааҕа Долгун Аал уотун оттон, буруо-тараа таһааран алаадьынан аһатар, алгыыр.
Дьоллоох Дьокуускай куораттан бу киэһэҕэ ыалдьыы кэлбиттэр: «Күрүлгэн» сурунаал бас дьаһабыла Афанасий Гуринов- Арчылан, «Байанай» сурунаал редактора Александр Постников-Сындыыс, Норуоттар икки ардыларынааҕы суруйааччылар сойуустарын чилиэннэрэ Василий Гоголев-Уйулҕан, Михаил Иванов-Чуона Мэхээлэ, Валерий Никифоров- Суор Уола,Егор Картузов.

Суруйааччы улуус баһылыгыттан «Горнай улууһун сайдыытыгар кылаатын иһин» бэлиэнэн, нэһилиэк баһылыгыттан кыһыл көмүс чаһынан наҕараадаланан, үөрүүбүт өссө үрдээтэ. Бу киэһэ элбэх сылаас, истиҥ-иһирэх тыл этилиннэ, Бэрдьигэстээх ырыа куттаах күөрэгэйдэрэ Нина Максимова, Нина Сутакова, Кирилл Мартынов, Иннокентий Буслаев бэйэлэрин эҕэрдэлэрин тиэртилэр. Үбүлүөйдээх көрдөөх кэпсээннэринэн олохтоох театр артыыстара сценка көрдөрөн киэһэни олус сэргэхситтилэр. Биһиги, «Сыккыстар», Сир иччилэрэ буолан, ой дуораана тыыннанан, суруйааччы хоһоонноруттан аахтыбыт.

Күндү Михаил Павлович, өссө элбэх сонун айымньылары эйигиттэн кэтэһэбит.

Эбии аах:

Бэлиэтээһиннэр

Ваш e-mail не будет опубликован.