Мукучуга интеллектуальнай оонньуу

Айылҕа харыстабылын, ыччат, Кэбээйи улууһа төрүттэммитэ 80,
Сайылык 65 үбүлүөйдээх сылларыгар аныыбыт.

Биһиги нэһилиэкпитигэр ыччат лидерэ Николаев Геннадий Михайлович биһиги эдэр ааҕааччыбыт буолар, кини көҕүлээһинин уонна этии киллэриитин ылынаммыт тэрилтэлэр салайааччыларыгар аналлаах интеллектуальнай оонньууну тэрийдибит. Уопсай сүбэнэн балаһыанньа оҥордубут, бөдөҥ даталарынан үллэһиннибит, ол курдук Николаев Г.М. ыччат уонна айылҕа харыстабылыгар,  Иванова А.А. нэһилиэк, Им И.Н. улуус туһунан темаларга аналлаах ыйытыылары бэлэмнээтибит.  Викторина ыйытыктарын толкуйдуурбутугар ааҕааччыларбыт интэриэстэрин, билиилэрин учуоттаатыбыт. Биир идэлээхтэрбит Кривошапкина Надежда Христофоровна (Сэбээн Күөл) уонна Ноговицына Туяра Васильевна (Чагда) тус кылааттарын киллэрдилэр.

Кыттааччылар эрдэттэн библиотекаҕа кэлэннэр нүөмэрдэри таллылар, хамаанда сүүмэрдэнэн, таҥыллан таҕыста, ону Геннадий Михайлович тэрийдэ. Ааҕааччыларбыт араас кинигэлэри, докуменнары уларсаннар бэлэмнэннилэр.

Дьэ, тыҥааһыннаах киирсии «Дайан» СК бэс ыйын 10 күнүгэр буолла. Эдэр ыччат бэрэстэбиитэлэ, нуучча тылын уонна литературатын учуутала Ноговицына Е.Е. салайан ыытта, ыйытыыларбытын буолаары аҕай эрэ турдаҕына биэрдибит.

«Киһи – айылҕа оҕото» диэн кынат тыллаах «Саһарҕа» хамаанда хамандыырынан Эверстов Е.П., онтон «Билбэппитин билэргэ дьулуһабыт» диэн девизтээх «Дьулуур» хамаанда хамандыырынан Иванов А. А. талыллыбыттар.

Дьүүллүүр сүбэҕэ үлэлииргэ уустуктардаах буолла, ол курдук икки хамаанда эрбии тииһин курдук тэбис — тэҥҥэ кииристилэр. Бастакы түһүмэх – айылҕаны харыстааһын, иккис – улууспут историятыттан, үһүс – ыччат туһунан, төрдүс – нэһилиэк историятыттан ыйытыылары ыытааччы биэрэн истэ.

Түһүмэхтэр быыстарыгар дойдубут сулустара Петр Кычкин, Айсен Иванов, Ирина Находкина ыллаан сэргэхситтилэр.

Түмүктүүр түһүмэх саамай быһаарыылаах кирбии буолла, манна «Саһарҕа» хамаанда кыайыылаах таҕыста. Хас биирдии хамаанда чилиэнигэр «Мукучу нэһилиэгэ» МТ дьаһалтатыттан грамота туттарылынна.

Кимнээх кытыныллар бу өй күрэҕэр? Махтанан туран ааттаталыыбыт: Иванов Афанасий Афанасьевич – Мукучу гимназиятын үөрэх эйгэтигэр завуһа, Андросова Мария Иннокентьевна – участковай балыыһа гинеколога, Иванова Анастасия Егоровна – «Кэнчээри» оҕо саадын салайааччытын солбуйааччыта, Кудрина Каролина Борисовна – «Дайан» СК директора, Эверстов Евгений Петрович – И.Е. Левин аатын сүгэр Танара орто оскуолатын директора, Кычкин Дмитрий Васильевич 3 №-дээх баһаарынай сулууспа салайааччыта, Яковлев Александр Иванович – ититэр хаһаайыстыба салайааччыта, Сидорова Вера Николаевна – почта начальнига, Стрекаловскай Геннадий Александрович – Сахателеком монтера.

Кыайыылаахтар бааллар, түмүк таҕыста, аныгыскы көрсүөххэ диэри, күндү ааҕааччыларбыт!

Им Ия Николаевна, Мукучу модельнай библиотеатын сэбиэдиссэйэ,
дьүүллүүр сүбэ бэрэссэдээтэлэ. 

Хаартыскалар 10 №-дээх филиал фондатыттан ылылыннылар.

  1. Аноним:

    бэрт!)

Бэлиэтээһиннэр

Ваш e-mail не будет опубликован.