Оҕо хаһыатын төрүттээччи

Бэҕэһээ Бүлүү улууһун Дьөккөнүгэр Саха Өрөспүүбүлүкэтин Ытык гражданина Нина Иннокентьевна Протопопова төрөөбүтэ 90 сылыгар аналлаах тэрээһин буолан ааста. Нина Иннокентьевна 1927 сыллаахха олунньу 18 күнүгэр Бүлүү улууһун Уотту нэһилиэгэр төрөөбүтэ. Саха государственнай университет историяҕа салаатын бүтэрэн, 1959 с. саҥа аһыллыбыт «Бэлэм буол» диэн оҕо хаһыатыгар ыҥырыллыбыта, онно тутаах эрэдээктэринэн 50 сыл 8 ый үлэлээбитэ. Ол туһунан Гиннесс рекордарын Кинигэтигэр суруйуу баар – «Саамай уһуннук үлэлээбит тутаах редактор». Нина Иннокентьевна Россия уонна Саха Республикатын культураларын үтүөлээх үлэһитэ, Норуоттар доҕордоһууларын уонна Бочуот Знага орденнардаах.

Дьөккөн – Нина Иннокентьевна кэргэнэ, Советскай Союз геройа, Аҕа дойду улуу сэриитин кыттыылааҕа Николай Алексеевич Кондаков төрөөбүт дойдута. Онно Н.А.Кондаков аатынан музейга Нина Иннокентьевнаҕа аналлаах экспозиция аһылынна. Музейнай уруок уонна кулуупка ахтыы киэһэтэ буолан аастылар. «Нина Иннокентьевна 2015 c. диэри биһигини кытта ыкса сибээһи туппута, сүбэ-ама, оҕолорго стипендия, курэхтэргэ спонсор уо. д.а. – араас өйөбүл элбэх этэ,»– дииллэр олохтоохтор. Тус бэйэтин үбүгэр Нина Иннокентьевна Н.А.Кондаков музейын салҕаппыта.

Салгыы тэрээһиннэр Уоттуга, Чинэкэҕэ уонна киин куоракка буолуохтара.

Бэлиэтээһиннэр

Ваш e-mail не будет опубликован.